Willkommen, Gast
Benutzername: Passwort: Angemeldet bleiben:
  • Seite:
  • 1

THEMA: Basler Fasnacht

Basler Fasnacht 11 Jan 2019 19:10 #1

Dr Fasnachts-Knigge

D Frau Fasnacht mecht gärn Ordnig ha,
drum biete mir dr Knigge aa.
Dr BFK git Root und Hilf
bisch informiert, stohsch nid im Schilf.

Dr Ärger foot im Herbscht scho aa
wenn ain syy Latz nid halte ka.
S Sujet isch nid zem umeschnuure
das sott doch klar syy naimeduure.

D Marschiebig isch au sone Punggt
wo mängge näbesächlig dunggt.
Drbyy wär's amme schampar wichtig
dert lehrt meh nämlig s'Laufe richtig.

Zedel schryybt meh Baseldytsch
klar und aifach-ohni Kitsch.
Dien Silbe zelle, Rym abglyyche
sunsch kenne Fähler yneschlyyche.

D Ladärne isch d Visitekarte
wo uff e Morgestraich soll warte.
Syy gheert bim Yypfiffe verdeggt
so blyybt das Kunschtwärk guet versteggt.

Wenn's denn am Mäntig vieri schloht
und jede uff sym Plätzli stoht,
sott s Kopfladärnli funggtioniere
es syg denn, wottsch di grad blamiire.

D Gugge mache noni mit
will's fir sii dr Zyschtig git.
Wo denn d Glygge sotte wyyche
und dur d Hintergässli schlyyche.

Liebi Gugge, dängged dra
bim Konzärt het me d Larve aa.
Mir sin do z'Basel, nid z'Lozärn
deert hän sii's ohni "Grinde" gärn.

Das goht speziell die Grosse aa
wo immer so viil Platz mien ha:
s het au glaini Glygge in de Stroosse
dient die nid nur uff d Syte stoosse.

D Blaggedde ghert uff jedi Bruscht
drey Dääg lang ohni isch's e Fruscht.
Und macht e ganz e schlächti Falle
das duet im Comite nid gfalle.

Mählsuppe isch e bsundre Gnuss
wenn's so richtig kalt isch duss.
Kääs- und Ziibelewaie-Duft
ghert drey Dääg in d Basler Luft.

Halt di zrugg mit Bier und Wyy
wenn de gnueg hesch, los es syy.
Ain wo pletzlig aafoot schwangge
ghert haim ins Näscht, statt wyter z'tangge.

Isch Pausehalt, denn hesch jo Zyt
die näggschti Baiz isch nid so wyt.
Renn nid dur Glygge oder Gugge
wart bitte uff die näggschti Lugge.

Und stohsch emol am Stroosserand
heb s Schreyholz, d Schlegel in dr Hand.
Blyyb still und loos de Andere zue,
gniess die Vorträg und gib Rueh!

Gheersch e Misston git's nyd z' lache
jede ka e Fähler mache.
S sin alli an dr Yyebig gsi
drum bhalt die fuule Sprich fir Dii.

De muesch au kaine parodiere
wo anderscht duet im Zug marschiire,
als das fir Dy Gschmagg richtig wär
syg tolerant, es isch nid schwär.

Stohsch wieder yy, lauf scheen gradus,
dramp nid an jedem Egge druss.
Lipf nie Dy Larve, due nid wingge
sunsch kennt's Dym Nochber afo stingge.

Yystoh haisst nid afo drummle
oder an de Gläbbli fummle.
Wart bis dr Major e Zaiche git
und jetzt fang a, mach richtig mit.

Sobald dr Zug afoht marschiere
hesch kai Zit meh zum handiere.
Und s Schälle zwischedure steert
well's rächts und linggs e jede gehrt.

S Sujet-Goschdym vo däm Joor
isch fir an Cortège, das isch woor.
Am Zyschtig und am Morgestraich
sottsch es nid trage, s wär e Saich.

Normal isch's an dr Fasnacht kalt
meh brucht den warmi Goschdym halt.
Fosch Du als Dambour afo schwitze
muesch d Ärmel glyych nid ufelitze!

Z'letscht isch d Lämpesitzig wichtig
wo diskutiert wird, was isch richtig.
Was soll me kinftig anderscht mache
und no anderi intärni Sache.

Am Bummelsunntig, dängged dra
sott meh au Stil und Haltig ha.
Eb lessig oder schwarz mit Huet
hauptsach isch s Glyggebild wirggt guet.

Durch s Band gilt Toleranz und Respäggt
nur so blybt unseri Fasnacht pfläggt.
S brucht Vorsicht, Rüggsicht und Humor,
mir mache is do gar nüd vor.

Wenn alli sich an d Regle halte
und kaine meh uff stuur duet schalte,
blybt d Fasnacht glaubet's, s isch kai Gfasel
die scheenschti Zyt im Joor vo Basel
Autor Unbekannt

Bitte Anmelden um der Konversation beizutreten.

  • Seite:
  • 1
Powered by Kunena Forum